अपडेट: झाँक्री प्रकाश भुजेलको गाडीले मोटरसाइकललाई ठक्कर दिँदा २ जना गम्भीर घाइते

काठमाडौं-झाँक्री प्रकाश भुजेलको गाडीले मोटरसाइकललाई ठक्कर दिँदा २ जना घाइते भएका छन् । बुधबार दिउँसो थली साँखु सडकअन्तर्गत इन्द्रेणीचोक नजिक भुजेलको गाडीले मोटरसाइकललाई ठक्कर दिँदा मोटरसाइकलमा सवार श्रीमानश्रीमती गम्भीर घाइते भएका प्रहरी प्रभाग साँँखुले जनाएको छ।

घाइते हुनेमा आलकोटका नारायण नगरकोटी र सानुमाया नगरकोटी रहेका छन्। उनीहरुको संखारापुर अस्पताल नारायनटारमा उपचार भइरहेको छ। प्रहरी प्रभाग साँँखुका अनुसार थलीबाट साँखु जाँदै गरेको गाडीले मोटरसाइकललाई ठक्कर दिएको हो।

यद्यपी प्रहरीले चालक फरार र परिचय नखुलेको जनाएको छ। तर घटनाका प्रत्यक्षदर्शीले उक्त गाडी भुजेलको रहेको बताएका छन् । गाडी भुजेलका ड्राइभरले चलाएका थिए भने भुजेल गाडीमा थिए। दुर्घटनापछि दुबै जना फरार रहेका छन्।