काठमाडौँमा आज वर्षकै सबैभन्दा चिसो, तापक्रम २ डिग्री सेल्सियस

काठमाडौं -काठमाडौंमा आज यस वर्षकै चिसो भएको छ । जल तथा मौसम विज्ञान विभाग, मौसम पूर्वानुमान महाशाखाले आज काठमाण्डौको न्यूनतम तापक्रम २ डिग्री सेल्सियसमा झरेको जनाएको छ ।

यसअघि हिजो काठमाण्डौको न्यूनतम तापक्रम ३ दशमलव १ डिग्री थियो । महाशाखाले आज बिहान ८ बजेर ४५ मिनेटमा सार्वजनिक गरेको तापक्रम विवरणअनुसार सबैभन्दा कम जुम्लाको न्यूनतम तापक्रम माइनस ७ दशमलव २ डिग्रीमा झरेको छ ।

अहिले देशमा पश्चिमी वायुको सामान्य प्रभाव रहेको छ । अहिले देशभर मौसम सामान्यतया सफा रहेको महाशाखाले जनाएको छ । तराईका केही ठाउँमा हुस्सुरकुहिरो लागिरहेको छ ।

आज दिउँसो कोशी प्रदेशका पहाडी भू–भागमा आंशिक बदली रही बाँकी भू–भागमा मौसम मुख्यतया सफा रहने महाशाखाले जनाएको छ । यस्तै राति देशभर मौसम मुख्यतया सफा रहने छ ।